Archive for May 2013

Ahustacion riguroso di e exigencianan pa cu examen havo y vwo

Introduccion

Na aña 2008 e secretario di estado pa enseñansa (despues Minister) Sra. Marja van Bijsterveldt   a dicidi di ahusta e asina yama ‘zak/slaag regeling’ pa enseñansa secundario y haci’ e mas riguroso. Den e situacion bieu tawatin e posibilidad pa alumnonan cu tur cifra di examen central (CE) insuficiente, pero cu cifranan halto pa examen di scol (SE) por a slaag. Na October 2009 a anuncia e ahustacionnan na scolnan secundario na Hulanda, y na October 2010 a anuncia cu nan lo introduci’e den dos fase.

Ahustacionnan

E ahustacionnan na Hulanda ta lo siguiente:

(saca for di carta fecha 5 October 2010 di secretario di estado Van Bijsterveldt cu topico ‘Aanscherping van de exameneisen’ dirigi na scolnan secundario na Hulanda)

  1. Entrante aña escolar 2011-2012 e promedio di tur cifra di examen central (CE) mester ta 5.50 of mas. (CE-regel)
  2. Entrante aña escolar 2012-2013 ta permiti maximo un ‘5’ den cifra final (promedio di CE y SE) pa materianan matematica, Hulandes y Ingles (kernvakkenregel)

Kico esaki nifica pa Aruba?

Na juli 2012 minister Dowers y Minister Van Bijsterveld a firma un acuerdo na unda ta stipula cu Aruba lo introduci e ahustacion riguroso mas tarda 2016 (mescos cu resto di islanan den Caribe Hulandes). Esaki ta e texto na Hulandes.

“Om de gelijkwaardigheid van de Arubaanse diploma’s te kunnen blijven waarborgen dienen de exameninhoud, de exameneisen en het vakkenpakket van de Arubaanse opleidingen overeen te komen met die van de Nederlandse opleidingen. Aruba zal daarom de aanscherping van de exameneisen – overeenkomstig met de aanscherping in Nederland – uiterlijk invoeren op 1 januari 2016 voor de havo-examens en op 1 januari 2017 voor de vwo-examens.”

Si Aruba kier pa su diplomanan keda ekivalente cu esunnan Hulandes, lo mester introduci e ahustacionnan ariba menciona.

Materia extra pa examen?

Ultimo dianan a circula noticianan eroneo rond, cu e acuerdo aki aparentemente lo nifica cu Aruba lo mester introduci 7 materia pa examen pa havo y 8 pa vwo. Actualmente na tur dos tipo di scol na Aruba ta obligatorio pa tin minimal 6 materia pa examen. Esaki ta hancra den nos leynan, y no di awo pero desde existencia di havo y vwo na nos pais. Un di e motibonan lo ta cu nos muchanan mester mas tempo pa cada materia, mirando e echo cu nos idioma di instruccion no ta nos idioma materno. Si por ehempel un alumno den ‘bovenbouw’ na Hulanda ta haya 3 ora di Hulandes pa siman, aki na Aruba e alumno ta haya 5 ora di Hulandes pa siman. Y asina diferente otro materianan tin mas ora cu esunnan na Hulanda. Esaki ta haci cu e ‘rooster’ di e alumno, eigenlijk no tin mas luga pa pone mas materia sin corta den e ‘lessentabel’. O sea cu e cantidad di oranan pa siman pa cada materia lo mester bira menos, sino e alumno lo haya mas cu 40 ora di les.

Materia extra, algo pa futuro?

Sin duda algun, nos lo kier pa nos muchanan tin mes chens na Hulanda cu esunnan aya. Si es cu pais Aruba kier bay e direccion cu nos diploma ta igual (gelijk) y no mas ekivalente (gelijkwaardig) nos lo mester traha di awo pa por realisa esaki den futuro. Y no solamente djis un materia extra, sino un ‘profielvak’ extra. E manera di djis kies un materia extra (keuzevak of extravak) lo no yuda pa ta igual. Na Aruba nos tin 3 ‘profielvak’ y un of dos ‘keuzevak’. Y esaki tambe ta hancra den ley. O sea cu no por skirbi ningun diploma cu 4 ‘profielvak’. Es mas, na Hulanda e vwo tin un ‘profielvak’ extra y un di dos idioma stranhero banda di Ingles compara cu loke nos tin awo. Por cierto si introduci esaki, lo mester revis’e dia Papiamento bira materia di examen pa havo y vwo.

Si introduci e materia(nan) extra, esaki lo mester tene cuenta cu un asina yama ‘bezemgroep’. Alumnonan cu a keda sinta, of no a slaag, tin un ultimo oportunidad pa haya un diploma estilo bieu. Esaki no ta algo desconoci, e a pasa caba na momento cu Aruba a introduci su ‘profiel-diploma’.

Rekentoets

Loke si ta parce di bira un realidad mas y mas den futuro cercano ta e introduccion di un ‘rekentoets’ como parti di e examen aki na Aruba. Aña escolar 2012-2013 ta e di dos aña  cu na Hulanda tin un proyecto piloto di ‘rekentoets’.  Den añanan escolar 2013 – 2014 y 2014 – 2015 e alumno na Hulanda mester haya por lo menos un ‘5’ pa e ‘rekentoets’ aki pa e por slaag. Finalmente entrante 2015-2016 e ‘rekentoets’ lo bira parti di e ‘kernvakkenregel’ na Hulanda.

Presupuesto pa enseñansa

Tur e cambionan aki na Hulanda a bay pareu cu un inversion substancial den enseñansa. Aki na Aruba e no por bay otro tampoco. P’esey SIMAR ta urgi Gobierno pa tene cuenta cu cambionan grandi cu ta na caminda y aloca fondonan, pa nos muchanan por sigui gosa di enseñansa di calidad.