Archive for April 2014

SIMAR lo no participa mas na manifestacion di 1 di mei

Maske cu Aruba ta un pais democratico, ta un lastima cu respet pa derecho di expresion ta ser trapa pa su mesun ciudadanonan.
Sindicato di Maestro di Aruba a ser invita pa FTA pa tuma parti na e manifestacion di dia 1 di mei proximo. Directiva di SIMAR na su turno a wak esaki cu positivismo y cu entusiasmo y consciente kier a participa pa duna balor y honor na e celebracion di Dia di obrero, pa recorda logronan di obrero y sindicalistanan cu den pasado a para pa derechonan cu te cu awe nos ta goza di nan.
Directiva a tuma nota durante e ultimo dianan di diferente desaroyo rond di e manifestacion aki. Entre otro comentarionan riba Facebook, via e-mail, yamadanan anonimo y reaccionnan riba articulonan den medionan electronico ta demostra cu e esencia di e manifestacion a cambia por completo. E a haya un tint completamente politico, ta indica di lo bira un marcha di protesta y por mira claramente cu no tin respet pa opinion di otro ni pa e libertad di expresion.
Cu e nificacion di e palabra “manifiesto” den mente, cu no ta igual na “protesta” of “demostra”, directiva tabata desea di vocifera PUBLICAMENTE e preocupacionnan regardando enseñansa dilanti. Esaki no ta nifica cu no ta trahando riba nan, ni cu Minister di Enseñansa no ta na haltura di esakinan.
SIMAR na ningun momento kier a participa pa motibonan negativo, ni pa sostene ningun partido politico. Tampoco a nenga na ningun momento cu e relacion entre SIMAR y Minister di Enseñansa Sra. Michelle Hooyboer- Winklaar y su team ta hopi bon y cu ta reuni MENSUALMENTE riba un base structural pa atende cu posicion huridico di miembronan y puntonan di preocupacion pa cu enseñansa en general. Trabounan cu pa hopi aña ningun Minister di Enseñansa a atende na e forma cu ta tumando luga actualmente conhuntamente cu directiva di SIMAR. Al contrario: SIMAR pa medio di su Noti-SIMAR semper a informa su miembronan di e desaroyonan aki. Miembronan y publico en general por a tuma nota di esakinan via prensa cu na varios ocasion tabata presente na dicho reunionnan. Tambe ta duna tur informacion di e desaroyonan aki durante reunionnan (ALV’s) di SIMAR.
Pa loke ta e invitacion cu Minister Hooyboer-Winklaar no a ricibi, ta trata di motibonan fuera di alcance di directiva cu esaki a yega net despues di cu e articulo di SIMAR a ser publica. Su persona a ser notifica personalmente y na e mes momento el a duna su punto di bista y proposicion na directiva pa sinta na mesa dia 1 di mei, en bes di participa na e manifestacion.
Directiva, despues di a tuma nota di e desaroyonan ya menciona y despues di a discuti esakinan durante reunion di directiva dialuna ultimo, a dicidi cu SIMAR lo no participa mas na e manifestacion di dia 1 di mei.

Feliz dia di obrero!

Feliz_dia_di_obrero_SIMAR

Festival di canto

songfest2014