Archive for May 2014

Society for Caribbean Linguistics: 20th Biennial Conference

ConfPoster_web.000

 

Workshop 27 mei: Teacher’s Toolbelt

simar-teachers_toolbelt_27mei

SIMAR a trata topiconan indexering y pensioen‏

Diamars 13 di mei, SIMAR a tene un reunion extraordinario pa trata e temanan indexering y pensioen. Den un sala relativamente yen, miembronan a haya un splicacion amplio di e situacion di APFA,  di su futuro y di e contenido di e protocol cu gobierno proximamente ta desea di firma hunto cu sindicatonan di Aruba.

Sindicatonan, incluyendo SIMAR, a sinta na mesa na januari (e tempo ey representa pa ex-presidente Igmar Davelaar) pa e negociacionnan aki. Na cierto momento esakinan a tranca y na april, despues cu sindicatonan a exigi Minister Yrausquin pa bin bek na mesa, a cuminsa negocia di nobo (directiva actual). Tur e sindicatonan cu ta representa empleadonan publico a participa na e reunionnan bilateral cu Minister Yrausquin. A negocia te na cuminsamento di mei, caminda conhuntamente a yega na e protocolnan di indexering y pensioen (draft).

SIMAR a invita Sr. Keesen (specialisa entre otro den pensioen) di Keesen Actuarissen di Corsou, pa duna un presentacion cu splicacion detaya di e situacion actual di e fondo di pensioen APFA. No ta desconoci cu e fondo tin un “dekkingsgraad” di 78% y cu esaki ta core peliger di baha mas si no haci algo pronto na dje, entre otro hisa e edad na 65 aña. Den caso cu no sanea e fondo, lo yega un momento den futuro cercano cu pensionadonan lo no por ricibi nan pago. Durante e presentacion a bin diferente ehempel dilanti di e diferencianan entre e pago di pensioen actual y esun di futuro si esaki wordo implementa. Tambe Sr. Keesen a duna splicacion di diferente componente cu ta poni den e protocol cu gobierno tin riba mesa y su pro’s y contra’s.

 Despues di esaki directiva a duna un presentacion di e proceso di negociacion cu a tuma luga entre gobierno y gremio sindical pa cu e 7.6% di inhaalmanoeuvre cu gobierno debe empleadonan publico y di e indexering di salario den futuro. Tambe a duna splicacion amplio di e ultimo proposicion cu tin riba mesa y e relacion cu esaki tin cu e protocol di pensioen. Mester menciona cu e prome proposicion di gobierno tabata di duna “nada” (Fls 2000,= un solo biaha y hala inhaalmanoeuvre un banda pa semper) y cu diferente contra-proposicion di parti di sindicatonan a yega na e ultimo proposicion. 

Miembronan den sala a haci diferente pregunta y a trece proposicion dilanti pa directiva hiba bek na mesa. Na final miembronan presente a vota pro of contra di e ultimo proposicion di gobierno. 

Di e miembronan presente, un total di 40 a dicidi di vota cu e siguiente resultado: 

25 pro, 7 contra y 8 a abstene di vota. Cu e resultado aki directiva a haya e mandato pa bay di acuerdo cu e protocolnan menciona. Ta bon pa miembronan keda pendiente di e siguiente desaroyonan y ta sugeri miembronan pa ta presente na reunionnan cu directiva yama. 

Adhunto e ultimo proposicion di gobierno y e tabel di pago di 7.6% di inhaalmanoeuvre.

Ultimo proposicion di gobierno:

  • Afl. 850,= fiho entrante augustus 2014 (1.91%).
  • Aumenta e Afl. 850,= cu 0.7% pa aña (Afl. 317,=) desde augustus 2017 te cu augustus 2024 pa cubri e restante pa paga e 7.6% completo.
  • Basa riba e “modale inkomen”, cu ta Afl. 3715,=. 
  • Ta hisa bashi premie y gelijk bedrag (tabel), ta cubri total 5.7% di modale inkomen.
  • Ningun compensacion mas te na 2018.
  • Hinca un mecanismo den ley con pa indexa.
  • Lo indexa desde 2019.
Ultimo proposicion den un tabel:
 
  Voorjaarspremie; Najaarspremie; Reparatiepremie Totale bedrag aan premies
(Bashi premie) (Gelijk bedrag) (nobo)
2014 Afl. 1500,= Afl. 1500,= Afl.  850,= Afl. 3850,=
2015        1500,=        1500,=         850,=        3850,=
2016        1500,=        1500,=         850,=        3850,=
2017        1500,=        1500,=        1167,=        4167,=
2018        1500,=        1500,=        1485,=        4485,=
2019        1601,=        1601,=        1601,=        4803,=
2020        1706,=        1706,=        1706,=        5118,=
2021        1812,=        1812,=        1812,=        5436,=
2022        1918,=        1918,=        1918,=        5754,=
2023        2024,=        2014,=        2024,=        6072,=
2024        2129,=        2129,=        2129,=        6387,=

Di dos yamada pa reunion extraordinario URGENTE

Cu temanan indexering/inhaalmanoeuvre y posibel aumento di edad di pensioen di APFA.

Pa diabierna ultimo di Sindicato di Maestro di Aruba a yama un reunion extraordinario urgente pa trata e temanan indexering/inhaalmanoeuvre y posibel aumento di edad di pensioen. Pa e reunion aki no tabata tin quorum. Directiva a duna esunnan presente un relato cortico di negociacionnan cu a tuma luga y un splicacion di e ultimo proposicion di Minister Yrausquin. Tambe a papia di e situacion pa cu APFA y aumento di edad di pensioen na 65 aña. No a habri discusion ni a permiti pa haci pregunta, ya cu segun statutonan sin quorum no por tuma decision. E di dos reunion lo ta DIAMARS 13 di MEI 7:30 pm. Den e reunion aki lo amplia mas riba e temanan y lo dicidi hunto si ta acepta e proposicion cu ta riba mesa.
SIMAR ta urgi tur su miembronan y tur otro trahado den enseñansa pa bin scucha, duna opinion y yuda pa tuma un decision responsabel. E situacion aki ta hopi delicado y ta trata di BO DERECHO, BO CARTERA y BO FUTURO. P’esey, SIMAR ta conseha tur trahado den enseñansa cu no ta miembro ainda, pa pasa durante oranan di oficina na sede di SIMAR pa inscribi. Inscripcion tambe ta posibel e anochi di reunion.
Un boca bisa otro. Yuda plama e informacion di e yamada aki via facebook http://www.facebook.com/sindicatodimaestro, twitter @SindicatoSIMAR y e-mail. Subi nos website http://www.simar.aw pa mas informacion y inscribi no mes pa ricibi tur noticia pa medio di nos sistema automatisa di manda mensahe Noti-SIMAR. Tambe por di manda un e-mail cu bo informacion na directiva@simar.aw.
Wak pa bo ta presente, pa otro no dicidi pabo.

 

Reunion extraordinario tocante Indexering/ inhaalmanoeuvre‏

Proposicion di Minister di Finansas pa cu indexering/inhaalmanoeuvre ta aceptabel????

Directiva di Sindicato di Maestro di Aruba ta haci un yamada URGENTE na su miembronan pa asisti na un reunion extraordinario diabierna venidero, 9 di mei pa 7or di anochi na sede di SIMAR.

Pa algun siman SIMAR a participa na reunionnan bilateral cu Minister di Finansas, Sr. Juan David Yrausquin pa negocia e pago di inhaalmanoeuvre/ indexering di 7.6% cu gobierno debe empleadonan publico. E debe aki ta basta bieu y despues cu a welga 7 siman largo na aña 2008, a yega na cuminsa paga esaki negociando cada aña. Den e ultimo protocol, sindicatonan y gobierno a bin na un acuerdo cu na januari 2014 lo a sigui cu e negociacionnan. A cuminsa pero na un cierto momento esakinan a pega.

Sindicatonan a exigi pa Minister di Finansas sinta na mesa pa trata e tema separa di esun di edad di pensioen y asina algun siman pasa a cuminsa cu e negociacionnan. Dialuna ultimo despues di varios proposicion di tanto Minister, como di sindicatonan, e Minister a duna su ULTIMO proposicion y a bisa cla y raspa cu e lo no cambia esaki mas. Un proposicion cu MESTER ser trata cu miembronan.

Pa esaki directiva di SIMAR ta invitabo pa t’ey sin falta diabierna venidero na sede di SIMAR. Tambe directiva lo splica un cu e otro tocante e POSIBEL aumento di edad di pensioen pa loke ta trata APFA.

Un boca bisa otro. Yuda plama e informacion di e yamada aki via facebook http://www.facebook.com/sindicatodimaestro (like e pa bo keda na haltura di tur desaroyo), twitter@SindicatoSIMAR y mail. Subi nos website http://www.simar.aw pa mas informacion y pone bo mes disponibel pa ricibi tur noticia pa medio di nos webmaster, dor di manda un e-mail cu bo informacion na directiva@simar.aw.

Directiva ta urgi un y tur pa ta presente pa tin quorum, pa hunto nos dicidi, ya cu e decision cu cay mester bay bek mesa diahuebs 15 di mei. Alabes ta invita tur maestro cu no ta miembro di SIMAR ainda, pa no duda y pasa na oficina inscribi bo mes. No laga ningun hende contabo, ni laga otro dicidi pa bo.

Directiva nobo di SIMAR a reparti e tareanan

Dia 29 di april miembronan di SIMAR a eligi miembronan di nan Directiva pa añanan sindical 2014-2016. E tareanan a ser reparti como lo siguiente:

Presidente Sra. Sheila Tromp, secretaria Sra. Maroeschka Cornelie, tesorero Sra. Natalie Carlo, vice-presidente Sra. Carolina Kelkboom y comisario Sra. Aquannette Gunn.

E Directiva ta trahando riba diferente terenonan cu ta regarda e empleado den sector di enseñansa y otro asuntonan interno. Entre otro: ta negociando indexering/inhaalmanoeuvre, ta atendiendo reunionnan di restructuracion salarial, ta forma parti di comision di enseñansa y ta participa na dialogo social. Directiva tin relacion estrecho cu tur sindicato y diferente partnernan social. Cu Minister di Enseñansa ta trahando riba base structural y regular. Pa loke ta trata asuntonan interno di sindicato lo continua cu e.o: e reglamento di cas, incentivonan pa recluta miembronan nobo y atende casonan huridico di miembronan.
Tin masha hopi trabou pendiente y e directiva ta consisti di 5 miembro pa atende cu tur e puntonan ariba menciona. P’esey ta haci un apelacion na miembronan pa pone nan mes disponibel pa forma parti di Directiva, ya cu tin espacio ainda pa 2 comisario.

Workshop: Designing Mind Changing Presentations

workshop_6mei

2014 Workshop Series

SIMAR cu directiva nobo pa añanan sindical 2014-2016

simar45

Den e reunion general anual cu a tuma luga diamars anochi 29 di april na sede di SIMAR, miembronan a eligi nan directiva pa añanan sindical 2014-2016. E constelacion nobo ta compañeranan: Natalie Carlo, Maroeschka Cornelie, Carolina Kelkboom, Sheila Tromp (tur cuatro reeligi) y Aquannette Gunn.

Presidente saliente, Sr. Igmar Davelaar, pa motibonan personal no a pone su mes reeligibel. Den un relato cortico Sr. Davelaar a conta na prome luga tocante su retonan y trabounan y a menciona cu entre otro un di su metanan tabata pa trece trankilidad den e sindicato y esaki a logra tambe. Na di dos luga Sr. Davelaar a gradici demas miembronan di directiva pa nan trabou, nan dedicacion y nan perseverancia a pesar cu e directiva tabata consisti di solamente cinco persona. A gradici na e ocasion aki tambe miembronan di comision di caha Sra. Aquannette Gunn y Sr. Dimitri Frans y tambe e miembronan di SIMAR pa nan confiansa den dje. Por ultimo Sr. Davelaar a laga sa cu e directiva nobo por conta cu su sosten y ayudo na tur momento.

Den e reunion aki trata tambe diferente puntonan. Entre otro: relatonan di secretaria, tesorero, y di comision di caha. E presupuesto pa 2014 tambe a keda aproba.

Mester remarca cu pa prome biaha den historia di SIMAR e directiva ta consisti completamente di damanan. Diamars awo e directiva nobo lo reuni pa reparticion di tarea. Entre otro lo dicidi cua di e cinco damanan lo guia e sindicato como presidente pa e proximo dos añanan sindical.