Archive for October 2014

Dia Mundial di Maestro 2014

worldteachersday

Inverti den futuro, INVERTI DEN E MAESTRO !

Maestronan ta un inversion pa e futuro di nos pais. Niun hende por predici loke nos muchanan lo topa cune como adultonan. Pesey mes e maestronan mester por tin e habilidad, conocemento y sosten pa asina por yuda cada mucha individual.
E aña aki nos ta celebrando e di 20 aniversario di Dia Mundial di Maestro. Mester celebra e dia aki tambe en grandi y duna honor na e persona cu ta e educador, e guia y e amigo. Esun cu ta sembra e simiya di curiosidad den e mente fertil di un mucha.

E MAESTRO
Ainda tin un deficit enorme di maestro mundialmente den enseñansa. E reto grandi ta keda e calidad di enseñansa: maestronan hopi biaha mester traha sin e materialnan necesario of sin trainingnan adecua. Banda di esaki e demanda ta halto enfrentando un crisis den educacion cu mundialmente alrededor di 250 miyon mucha cu no ta recibiendo e habilidadnan basico di educacion cu ta lesa y scirbi.

Den tur e cambionan cu mundo ta pasando aden NOS MAESTRONAN MESTER KEDA E PRIORIDAD. Comunidad y gobierno mester ta uni cu otro y solido pa duna sosten na e maestro y calidad di enseñansa. Mester percura pa bon condicion di trabou, cu contractnan y salarionan apropia; cu prospecto pa progresa den trabou. Bon ambiente na trabou, unda e por sinti su mes sigur, trainingnan di calidad pa maestronan. Pero tambe un management team efectivo. Pues e prioridad ta inverti den enseñansa, esaki no ta nifica inverti solamente den e infrastructura y material, pero den e maestro, su seguridad, su formación, pues al fin al cabo e ta e persona clave den calidad di enseñansa. E maestro ta indispensabel den un sistema di educacion y un bon sistema ta resultado di bon maestronan. SIMAR kier a desea tur MAESTRO awe un felis dia. Sinti bo mes orguyoso di tin e profecion cu ta yuda forma tur otro profecion na mundo. Felis dia di maestro.