Historia

Introduccion

SIMAR (Sindicato di Maestro di Aruba), antes VLA (Vakbond van Leerkrachten Aruba), a keda funda dia 1 di juli 1969 como e unico sindicato di maestro di scol. Prome cu esey na Aruba tawata tin 5 diferente sindicato: St. Thomasbond pa maestro di scol catolico, Protestant-Christelijke Onderwijzersvereniging Aruba (PCOVA) pa maestro di scol protestant, Arubaanse Onderwijsbond (AOB) pa maestro di scol di gobierno, Vereniging van Leerkrachten bij het Nijverheidsonderwijs in de Nederlandse Antillen te Aruba pa maestro di scol di ofishi y Vereniging van Leraren bij het Middelbaar Onderwijs in de Nederlandse Antillen (VELEMONA) pa maestro di Colegio Arubano.

Pues, prome cu 1969 e base di organisacion sindical den enseñansa tawata religion y tipo di scol. Ademas por ripara cu tanto e sindicato di maestro di scol di ofishi, como VELEMONA tawata seccionnan di sindicatonan Antiano. Prome cu a funda SIMAR, ya caba desde 1959 e sindicatonan cu tawata existi e tempo ey a crea un plataforma di cooperacion yama: Samenwerkende Onderwijsbonden (SOB). Sinembargo, e cooperacion den SOB no tawata masha estrecho, entre otro pasobra cada sindicato tawata tin derecho di veto. Cualkier sindicato den SOB por a para discusion di cualkier topico.

Kico a pone cu e sindicatonan a cuminsa uni mas cu otro, te cu a crea e sindicato nobo VLA? Di un banda mester menciona e discusionnan di e tempo ey tocante revision di salario, cu a bin resulta den Bezoldigings¬regeling Onderwijzend Personeel Aruba 1968. Den e discusionnan aki entre e sindicatonan y gobierno, e sindicatonan mas y mas a cuminsa sinti e necesidad di forma un solo frente pa confronta gobierno. E plataforma SOB a resulta demasiado debil y di eynan a surgi e deseo pa un cooperacion mas estrecho, cu a bin resulta den lantamento di VLA como unico sindicato di maestro. Di otro banda mester corda cu fin di añanan ’60 tawata un epoca di hopi cambio social, tanto na Europa y Merca, como na Antia y Aruba. Asina por corda e revolucion di e studiante- y obreronan na Paris na 1968. Tambe por corda e manifestacionnan na Chicago na congreso di partido Democrat, tambe na 1968. Mescos por corda 30 di Mei 1969 na Corsou. Na Aruba, finalmente, por corda tur e iniciativanan progresista, manera e revista Feneta y e fundacion Osticeba.

Den e ambiente aki di cambio social y emancipacion no ta nada straño cu e 5 sindicatonan a uni forsa pa forma e sindicato nobo: VLA. Asina mes e sindicato nobo a lanta bou di curatela di esunnan bieu, den sentido cu e presidentenan di e 5 sindicatonan bieu a keda automaticamente como consehero di e sindicato nobo. Ta despues di e welga di 11 di April 1970 e sindicato nobo a cuminsa haya su mes cara, su mes identidad.

Posicion huridico E welga di 1970, cu tawata tin como consigna ‘Adaptacion di salario’, tawata un di e prome accionnan di e sindicato nobo pa drecha posicion huridico di su miembronan y maestronan di scol en general. Defensa di posicion huridico di maestro di scol semper tawata y a keda e meta principal di VLA/SIMAR y esey ta keda refleha tambe den su statutonan cu den articulo 3 ta bisa:

De Bond streeft naar een vorm van onderwijs en opvoeding, die overeenkomt met de Verklaring uit artikel 2 en onafhankelijk van welke politieke partij dan ook stelt hij zich ten doel:

  • de behartiging van de materiële en ideële belangen van de leden en de nagelaten betrekkingen
  • de behartiging van de belangen van het onderwijs en de opvoeding in het algemeen
  • de culturele en sociale verheffing van het Arubaanse volk

Base di e welga di 1970 tawata adaptacion di salario, specialmente salario di e maestranan di enseñansa preparatorio (KO). Sinembargo, den careda di su 25 aña di existencia VLA/SIMAR a dedica atencion na varios otro aspecto di posicion huridico tambe.

Grupo di hende muhe di VLA/SIMAR

Grupo di hende muhe di VLA/SIMAR

Den di dos mita di arianan ’70 inflacion tawata un problema grandi: di april 1975 pa october 1982 e indice di inflacion a subi di 100 pa 187.2. Esey a haci cu e sindicato a pone hopi atencion na adaptacion di salario na costo di bida, miho conoci como ‘indexering’. Den e temponan ey, gobierno a introduci diferente variante di indexering, entre otro e famoso Plan 5C, y cada bes atrobe e sindicato mester a bringa pa salvaguardia poder di compra di maestronan di scol. Sinembargo, desde aña 1983 maestronan di scol no a haya indexering mas, mientras cu indice di inflacion mientras tanto a subi cu mas of menos 50 punto. P’esey mes indexering a bolbe bira un di e puntonan mas importante di discusion entre e sindicato y gobierno.
Tempo cu a funda VLA, posicion huridico di maestranan di scol y di empleadonan publico femenino en general tawata laga masha hopi di desea. Sinembargo, ya na aña 1973 55% di e maestronan tawata hende muhe, un porcentahe cu 20 aña despues a subi te 63%. Entre otro riba iniciativa di Grupo di Hende Muhe di VLA/SIMAR, e sindicato a cuminsa dedica atencion special na posicion huridico di hende muhe y asina a logra cu na aria 1973 a introduci ‘zwangerschapsverlof’, cu na aña 1983 hende muhe casa por a drenta servicio permanente y cu na aña 1990 a introduci un solo salario pa homber, muhe, casa y soltero.

Masalmente miembronan di VLA/SIMAR a marcha na ana 1975

Masalmente miembronan di VLA/SIMAR a marcha na ana 1975

Den su defensa di posicion huridico di maestro di scol VLA/SIMAR a uza varios strategia y tactica, entre otro welga. Sinembargo, contrario na locual gobierno y otro doñonan di trabou ta pretende, sindicatonan aki na Aruba, y den nan tambe VLA/SIMAR, masha poco ta uza e ultimo añanan aki. Den su prome 25 aña di existencia VLA/SIMAR a welga solamente 4 biaha:

  • na aña 1970 pa adaptacion di salario,
  • na aña 1975 pa participacion,
  • na aña 1981 den apoyo di e welga di maestronan di MTS y
  • na aña 1985 contra e medidanan di austeridad di gobierno.

VLA/SIMAR generalmente a basa su defensa di posicion huridico di maestro di scol riba informacion y conscientisacion di su miembronan, deliberacionnan cu gobierno y directivanan di scol y casonan dilanti hues. Den careda di tempo e sindicato a desaroya un experticio grandi riba e tereno aki y nos ta wak cu varios di e personanan envolvi den esaki despues a sigui studia y a bira hurista, abogado y hues. Aunke welga y casonan dilanti hues ta capta mas atencion, e trabou di tur dia ta mas basa riba conseho y informacion, entre otro via e publicacionnan Vorm/Skol i Komunidat, Tussenvorm/Mensahero, SIMAR-agenda y tambe e buki di N. van Lis-Donata y L. de Vries: ‘Rechtspositie Onderwijs¬personeel Aruba’ (April 1992).

Calidad di enseñansa
Segun articulo 3 di su statutonan, VLA/SIMAR mester sali na defensa di enseñansa y educacion. Pues, aki ta sali na cla cu VLA/SIMAR no ta solamente un organisacion sindical cu ta preocupa cu posicion huridico di maestro di scol, pero e ta tambe un gremio cu ta sali na vanguardia di calidad di enseñansa.
Ya caba na aña 1975 VLA a organisa e prome congreso di enseñansa aki na Aruba cu e tema: ‘Keda sinta…..un mester?’ Algun di e oradonan di afo na e congreso aki tawata: K. Doombos, autor di e buki: ‘Opstaan tegen het zittenblijven’ y D. Mackay, lider di e English Project na Isla’Riba. Mas despues, na aña 1984, na ocasion di su di dies lustro, SIMAR, hunto cu APA, a organisa e congreso: ‘E kalidat di enseñansa: E reto di e añanan ’80′. Algun di e oradonan di afo na e congreso aki tawata: E. Miller di University of the West Indies na Jamaica, E. Rojas Campos di Universidad Nacional di Costa Rica y F. Martins di Instituto Lingwistiko Antiano di Corsou.

Prome congreso di VLA

Prome congreso di VLA

Na ocasion di su di cinco lustro, SIMAR, hunto cu IPA y Departamento di Enseñansa, a organisa e congreso:. ‘Ervaringen en nieuwe denkbeelden in taalonderwijs en taalplanning’. Algun di e oradonan di afo na e congreso aki tawata: R. Severing di Katholieke Universiteit Brabant di Hulanda, Jorge Diaz Pozo di Universidad Pedagogico ‘El Libertador’ di Venezuela y R. Ruiz di University of Arizona di Merca. Na luna di october SIMAR, IPA y Departamento di Enseñansa a tene un di dos congreso di idioma cu e tema: ‘Taal: taalsituatie, taalbeleid en taalonderwijs op Aruba’.
Fuera di e congresonan grandi aki, VLA/SIMAR regularmente tawata organisa encuentronan mas chikito tambe den forma di workshop, seminario y simposio tocante entre otro: educacion preparatorio (1981), educacion fisico (1982) y idiomanan stranhero (1983). Ademas di cu e mes tawata organisa congreso y workshop, VLA/SIMAR a participa tambe na varios encuentro organisa pa otro instancia, tanto na Aruba y Antia, como den exterior. Asina por menciona: e onderwijssymposium di APA na 1986 aki na Aruba, e conferencia tocante e rapport di Unesco na 1977 na Corsou, e seminario ‘Idioma, Enseñansa i Desaroyo Nashonal’ di KOMAPA, UNA y UvA na 1988 na Corsou, e congreso di e sindicato di maestro COLPROSUMAK na 1976 na Honduras, e congreso di e organisacion di maestro di Caribe CUT na 1977 na St. Kitts y e congreso di e organisacion regional di maestro FLATEC na 1987 na Costa Rica. VLA/SIMAR semper a considera participacion na e tipo di encuentronan aki no solamente parti di su solidaridad gremial, pero tambe parti di su formacion di cuadra, specialmente pa e miembronan di su Onderwijscommissie.
Den e 25 añanan di existencia di VLA/SIMAR a sali hopi rapport cu ta trata un of mas aspecto di nos enseñansa; di parti di gobierno, di parti di e propio sindicato y di parti di diferente otro instancia y persona. Pa loke ta toca gobierno, den todo caso mester menciona e rapport di Unesco di 1976: ‘Netherlands Antilles. Education: Issues and Priorities for Development’, e rapport di Beleidsnota¬commissie (BNC) di 1981: ‘Enseñansa pa un i tur/Education for one and all’ y e tres rapportnan di 1988: ‘Het pedagogisch instituut. Een nieuw instituut voor de scholing van de onderwijsgevenden op Aruba’ – ‘Pa un enseñansa bilingual na Aruba. Nota di maneho pa introduccion di Papiamento den enseñansa na Aruba’ – ‘Renobacion di enseñansa: Prioridad pa futuro. Nota van de Stuurgroep Herstructurering Onderwijs’.
VLA/SIMAR, cu yudansa di su Onderwijs¬commissie, semper a aporta den comenta y discuti e rapportnan di gobierno y mes cos ta conta tambe pa e peticionnan pa comentario a base di articulo 3 di lei di enseñansa preparatorio, articulo 5 di ley di enseñansa basico y articulo 4 di ley di enseñansa avansa. Sinembargo, VLA/SIMAR no solamente tawata reacciona riba locual otronan ta skirbi, pero e mes tambe a saca varios rapport. Akinan nos por menciona por ehempel e nota: ‘Onderwijs en onafhankelijkheid’ di 1980 y e nota: ‘De toekomst van het onderwijs op Aruba’ di 1985.

Miembronan di redaccion di Skol i Komunidat (1986)

Miembronan di redaccion di Skol i Komunidat (1986)

Sinembargo, e medio principal cu VLA/SIMAR a uza pa publica su ideanan tocante enseñansa tawata su revista: Vorm/Skol i Komunidat. Den e revista aki a sali articulonan general, manera: ‘Onderwijs kan sociale ongelijkheid niet opheffen’ (Maart 1977), ‘Vrijheid van onderwijs’ (Juni 1985) y ‘Inovashon di enseñansa: kiko y con?’ (Februari 1989). Articulonan tocante cierto tipo di scol, manera: ‘ETAO op Aruba’ (Maart 1977) y ‘De APA blijft in het nieuws’ (October 1980). Articulonan tocante cierto materia, manera: ‘Geschiedenisonderwijs in de Nederlandse Antillen laat veel te wensen over’ (November 1977) y ‘Maatschappijleer, een probleemvak’ (December 1985) y naturalmente tambe articulonan tocante Papiamento, manera: ‘Papiamento, lenga indjän?’ (September 1977), ‘Nos situashon lingistiko’ (September 1982) y ‘Maneho y planificacion di idioma: e caso di Corsou y lesnan pa Aruba’ (Februari 1989).

Organisacion interno
No solamente e revista Vorm/Skol i Komunidat a sufri di falta di personal, e sindicato mes tambe regularmente no por a haya hende pa forma directiva. Den su 25 aña di existencia VLA/SIMAR tawata tin 11 directiva, pero tambe tawata tin 3 periodo sin directiva, esta: na aña 1977/78 (11 luna), na aña 1986/87 (5 luna) y na aña 1991/92 (9 luna). Sinembargo mester remarca cu e falta di boluntario aki no ta algo di VLA/SIMAR so; henter sector di iniciativa particular a y te ainda ta sufri di e cambio di mentalidad den comunidad Arubiano, caminda individualismo y materialismo a bin ta domina e mente. Como cu continuamente VLA/SIMAR tawata tin problema pa haya suficiente hende pa cumpli cu tur e tareanan, regularmente a discuti y trece cambio den organisacion interno di e sindicato. Asina a yega di traha cu seccion basa riba tipo di scol, pero tambe cu seccion cu un base geografico. A yega di introduci e sistema di secretariado, pero tambe e sistema di comision. A yega di traha riba un base puramente boluntario, pero tambe cu dirigentenan (parcialmente) paga. Pa yuda orienta e sindicato den su organisacion interno, pero tambe pa haya sa loke e miembronan mes ta pensa di esaki, a tene dos encuesta: na 1977 y na 1983.

Den careda di añanan tawatin diferente proposicion pa loke ta structura di SIMAR

Den careda di añanan tawatin diferente proposicion pa loke ta structura di SIMAR

A uza e dos encuestanan aki pa e publicacion ‘E base di SIMAR’ (Mei 1985) den cua a yega na e siguiente conclusion:
Historicamente SIMAR semper tabata tin un caracter tripel, esta:

  • sindicato
  • organisacion gremial profesional
  • sociedad recreativo

pero, den e pensamento di e miembronan, SIMAR mas bien ta un binomio: na prome luga: sindicato y na di dos luga grupo di presion pa cu e maneho di enseñansa.

  • Den di SIMAR tin un tendencia oligarkico, pero generalmente e miembronan no ta sinti esaki como un problema. Loke cu si ta un problema, ta e divorcio ideologico entre dirigente y miembronan, pero tin indicacion ku e intensidad di esaki a mengua.
  • Contrario na e expectativanan halto cu e dirigentenan di SIMAR semper tabata tin pa cu e nivel di participacion di e miembronan, pa e mayoria di e miembronan nan grado di envolvimento den SIMAR mas bien ta keda limita na djis paga nan contribucion.
  • En general e miembronan di SIMAR ta pro cooperacion sindical; den temponan trankil nan tin un preferencia gremial, pero ora cu ta trata accion sindical comun, e actitud gremial aki ta wordo supera pa un actitud netamente sindical.

Aunke cu e gran mayoria di e miembronan ta contra di cualkier envolvimento di SIMAR den politica partidista, tog e relacion di SIMAR cu asuntonan politico ta e asunto cu historicamente mas a crea un diferencia di opinion bou di su dirigentenan.
E organisacion interno a keda un punto di hopi preocupacion pa SIMAR. Asina por lesa den e Plan di maneho 1993-1994: ‘Directiva a tene un evaluacion pa loke ta trata su funcionamento conhuntamente cu un comision di experto di propio hendenan… E reorganisacion interno di SIMAR ta keda un di e prioridadnan, tambe pa e directiva nobo… Cu e reorganisacion aki nos kier profesionalisa, rehubenese y fortifica e sindicato cu na april 1994 ta cumpli 25 aña.

Union sindical : “Un illusion of un realidad?”

Union sindical : “Un illusion of un realidad?”