Otami Thomasia

Comisario/2nd secretario

Otami Thomasia

Pa esnan concerni,

Mi nomber ta Otami Thomasia naci na St.Maarten 29 dec 1986. Desde mi tres aña mi ta biba na Aruba.

Mi ta biba na Cura Cabai pero mi a lanta den bario di Congo weg / Brazil na mi wela su cas. Mi a atende Scol Preparatorio Rayo Di Solo, Commandeur Pieterboer kleuter y basis. Despues di basis mi a logra bai colegio Arubano. For di chikito mi kier a bira maestra, pero lastimamente despues di Colegio mi a bai traha den banco. Despues di shete aña, mi a dicidi pa sigui mi soño di bira maestra. Cu e sosten di mi mayornan mi a logra bai Instituto Pedagogico Arubano na 2012 te cu 2016. Esaki sigur ta un decision cu mi no a lamenta ningun momento. Awe mi ta para firme ariba mi dos pia. Mi ta un mama di dos yiu homber, un di 8 aña y un di 8 luna. Mi yiunan ta shelo y tera pami. Mi tempo liber mi ta dedica na nan. Mi ta yuda cu entrenamento di un team di baseball. Antes mi tawata  maneha un team. Dor di mi embaraso mi no por a cumpli 100 % mas  y mi a dicidi pa laga e team den man di un otro persona. Mi ta un persona cu ta kere den duna 100% maske  ta algo voluntario.

Mi ta nobo den enseñansa, mi a traha un aña den kleuter onderwijs na Scol Preparatorio Tarcisius cu ta cai bou di SKOA y esaki ta mi dos aña trahando na Commandeur Pieterboer Basisschool  cu ta cai bou di DPS. Durante e tres añanan mi a experiencia momentonan dificil y momentonan dushi, pero tur ta momentonan cu mi a siña algo di nan den bida y a yudami crece den mi profession. Maske cu mi ta nobo den mi profession mi ta wak cu tin falta di hopi cosnan importante den enseñansa , specialmente pa cu personal. Ultimo tempo maestronan tin hopi trabou pa haci. E directivanan anterior a haci hopi pa loke ta nos derecho, pero tin cambionan den nos comunidad  cu ta causando cu e muchanan y hobennan ta cambiando  drasticamente. Esaki ta duna un señal cu nos como maestro y miembronan di nos comunidad mester cambia tambe. Esaki ta pone cu ami ta interesa pa forma parti  di e directiva di SIMAR, pa sigur aporta na e cambionan y brinda ayudo unda cu tin mester den nos enseñansa.

Mi ta spera di por conta ariba bo sosten , specialmente sosten di nos maestronan nobo den veld manera mi persona.